قواعد اللهجة المصرية

س: بالهنا والشفا. ثانية بس هشوف مين اللي بيخبط
سندس: كتك ضربة
كوريا: يووه أنا جيت ناحيتك دلوقت
س: ايوه
كوريا: بقول ايه أنا قصداكي في خدمة
س: انتي بتكلميني أنا
كوريا: اومال سندس
سندس: ملكيش دعوة بيا. سبتيني ياختي خايفة وجعانة
س: تعالي تعالي يا حبيبتي
كوريا: والنبي يا خالتي استني دلوقت
س: خير
كوريا: عايزاكي تكلمي لي الضابط بتاعك
س: الظابط بتاعي! ليه
كوريا: هيمة جه له استدعا مـ النيابة وعايزين نعرف الاستدعا ده ليه؟ (يعني طالبينه)
سندس: أنا اللي هكلم الضابط أنا وأقول له ياخدك يحطك في السجن علشان انتي سبتيني أنا يا كوريا
كوريا: معلش يا خالتي. حقك على دماغي. حقك على دماغ امي الله يرحمها بس والنبي والنبي سيبيني اشوف المصيبة اللي أنا فيها
س: مابكلموش
كوريا: نعم ياختي انتي هتعمليهم عليا ولا ايه
س: جه لي من يومين المحل وقلت له ماتكلمنيش تاني ومشي زعلان
كوريا: طب معلش يا جوليا تعالي على نفسك عشان خاطر الواد لينطس فيها حكم غيابي ويتحبس (ياخد بس بطريقة فلاحي وشعبية)
س: مليش دعوة. خدي نمرته وكلميه انتي
كوريا: ماينفعش أنا اللي اكلمه مش هيعمل حاجة. انتي اللي لازم تكلميه وتدلعي عليه عشان يعمل لنا المصلحة بعد كده انشالله تولعوا في بعض
سندس: اتدلعي ايوه اتدلعي
س: بقول لك مليش دعوة مش هكلمه
كوريا: هو ايه اللي مش هتكلميه ده؟ ليه إن شاء الله. كل ده عشان كرامتك يعني؟ لو انتي مش حاسة احنا عاملين عشانك ايه ده احنا ملبسين نفسنا قضية عشان متسترين عليكي و كدبانين عـ الحارة كلها (يعني بنكذب) ومقسماني في اكلي وشربي ونومي وحمامي وشايلة همك ليل ونهار كإنه همي. يا شيخة ده حتى لما نزلتي الصبح وغبتي قلبي وجعني عليكي كإنك اختي ولا بنتي كل ده مفيش تقدير؟ هو انتي ايه كإن الناس دي كلها بتشتغل عندك مابتحسيش بيهم؟ يا شيخة ايش حال لو ماكنتش جاية لك يعني وبقول لك ده أنا قصداكي في خدمة. ده بدل ما تقولي لي تؤمري ولا من عينيا الاتنين زي الناس الجدعان تقولي لي لا طبعا. صحيح اللي بيئني كلب بيطمر فيه واللي بيئني انسان بيعضه (بيربي)
س: كلب؟! ماشي يا كوريا. أنا كنت هكلمهولك بس دلوقتي عمري ما هكلمه ايه رأيك